上一款2.5版改頭換面，全車喪加菱形Design，相當驚喜；今勻新款反而集中喺「偷工減料」上，咪以為Mazda偷懶呃錢，實情係引擎c.c.由2.5降至2.0，不但車價可減一截，連耗油量亦得以進一步降低，出車後一樣繼續慳。喺現今日圓、油價高企嘅日子，偷工減料對打工一族絕對更吸引！
新版仍然保留6系「平民小跑車」特色，車身斯文但頭尾超惡，菱形燈及擴大氣壩功不可沒，車櫳中控台及藍光加紅光錶版，一撻車由波棍慢慢逐忽向上着燈，似足飛機駕駛艙咁有氣勢！

有姿勢有實際，MZR2.0LS-VT引擎達147匹馬力，只比2.5版低23匹，搭埋18.8kgm/4,000rpm高扭力及+/-波，玩頭段爆炸力一流。若2.5版似戰鬥機，新版2.0點都似小型飛機格局，又快又順滑，以後師奶、阿姐都唔怕出唔到迴旋處喇！值得一讚係其電子輔助軚盤，慢車時相當之輕，泊車時好舒服，女仔一隻手已可瀟灑應付S位，而當車速提高時，軚盤會稍為變緊，令行駛不致「太飄」，夠安全。
2.5版啱啱加咗價至$248,000，2.0版就唔使20萬，不過咪以為會將貨就價，8氣袋、6碟CD連MP3一樣落齊。最正係電椅記憶功能，每條車匙都有一組記憶，一開車門已識得前後上下自動校正番張凳，男女主人一坐便到位，毋須花時間郁嚟郁去，好體貼喎！

引擎：1,999c.c.MZRS-VT引擎
馬力：147hp/6,000rpm
扭力：18.8kgm/4,000rpm
傳動：5前速+/-半自動波箱
查詢：Mazda陳列室（28931112）