行走江潮，最忌唔識Social，連如何Hi點樣Bye都唔識？唔使騰，記住呢個口訣就得啦：「騷」「So」。

「騷」，做Show也！出得嚟行，當然Say Hi都要Say得浮誇！大家練習一吓：（吸氣！大聲！）「Wei~~~~~~~（拖長、漸細），好耐冇見呀，你呢期點呀……」成句句子有11個字，但個重點係個「Wei」，只要重音、長度拿捏得精準，自然順利向各路人馬下馬威！

進階嘅「Social精」，更加會配合肢體動作，加深對方印象：兩手食指一前一後擺，指住對方，面帶微笑，至於眼神呢方面，就更加係精髓：瞇起少少，想像吓挑逗得來帶點挑釁，咁就中晒！

後面兩句音調都唔好忽視！「好~耐冇見呀」，重音喺個「好」字，呢句要畀少少感情，交啲啲戲，要有一種彷如隔世嘅感覺。只要前兩句交到戲，去到第三句就可輕描淡寫啲，順利將話題伸延。

正所謂「行船爭解纜，Say Hi要講先」，行走Social場合，見到一個識你嘅人，最緊要先發制人！特別係咩情況？就係你完全、根本、100%對你面前呢條友零印象！

「Wei~~~~~~~好耐冇見呀，你呢期點呀，撈緊咩？」
「都係咁啦，繼續做緊咩咩咩。」
主導對話內容，你就更易猜度對方，到底係咩頭咩路住喺邊一度。

嗱！做戲做全套，做騷都係有道具好，一張勁嘅卡片就少不了。如果本身份工Title唔夠照，唔怕！自己卡片自己作，你諗到咩Title就寫晒落去，咩「港九新界潮汕福建X氏宗親會創會會員」「Mensa十年資深會員」「圍威喂協會總幹事」「XXXX University BSc(Hons) in Waterblowing」總之諗到咩就寫咩！幾多先夠？當你寫到張卡片要對摺就夠！個個人收到你張卡面，就好似收到醫務所嘅覆診卡咁，咁就Perfect池！

講完「騷」，就講「So」（粵語第四聲），亦即「Jetso」也。Social完想令人對你印象深刻，覺得你好勁？呢招好易明，就係要識把握記會去認叻，搶住畀著數人。

「近來阿A君又紅咗呀…」
「我同佢好熟架，得閒介紹你識呀，上星期先同佢食飯，搵次介紹你識。」（明明只係去同一個Event，連手都冇握）
「我最近想做一個Project…」
「啊！等我諗吓先，我識呀B君，係呀好紅嗰個，佢應該幫到你，我幫你約佢。」
「我想識呀…」
「啊！我識佢呀，介紹你識，包喺我身上。」

識做「騷」，仲識搶住畀「So」，你行走Social場合，真係事半功倍，無往不利（可能）。不過，呃得一時，呃唔到一世。只係識得吹水做騷畀Jetso又點？最後一個人有冇朋友，睇真誠；成唔成功，睇實力。試問，你幾時見過李嘉誠行出嚟「Wei~~~~~~~（拖長、漸細）」；難道朱克伯格行出黎，你問佢「Where's your name card?」所以，四圍派「對摺卡片」嘅人，都係環保啲、慳啲啦！

by千頌C@堆填區
http://fb.com/winbigwok

蘋果財經，關心你飯碗
http://fb.com/appledailyatm