當年今日

兄妹同心賀兆榮成婚 獨欠祥嫂
馮仁昭四圍超:兆尊「飛鴿傳書通知佢呀?」

蘋果日報 2005/01/16 00:00


自從鄧家爭產事件告一段落後,鄧兆尊同佢班弟妹,甚至祥嫂都低調咗好多,噚日兆尊胞弟鄧兆榮娶老婆,佢同新婚太太區嘉儀喺中環大會堂註冊,夜晚就喺灣仔君悅酒店擺酒,筵開四十幾席,由兆尊同女方父親擔任主婚人,而小艾(鄧翠玉)同妹妹鄧碧玉都有到場觀禮,場面都幾熱鬧。

兄妹冰釋前嫌
冇見好耐嘅小艾,抱住個兩歲幾嘅仔嚟到,但佢老公釣魚郎就唔見影,其實嗰陣兆尊反對小艾同釣魚郎一齊,𠵱家小艾個仔都咁大,所以佢哋幾兄妹都冰釋前嫌,不過祥嫂依然冇現身。馮仁昭就問兆尊有冇請祥嫂嚟參加婚禮,兆尊就話:「點通知?飛鴿傳書呀?大家都知乜嘢事,係都通知珍姐(無綫高層曾勵珍)先啦,其實好多朋友都知,但唔知嚟唔嚟,佢(指祥嫂)都知㗎,但佢唔會嚟囉,佢點會理我哋啫,佢只顧自己嘅生活。」

開出擇偶條件
噚日阮少祥、何婉盈、胡敏珊等都有份做兄弟同姊妹團,現場好多親友一見兆尊就催佢快啲結婚,點知兆尊竟然話:「我唔會住,不過企得喺我側邊嘅都會好穩定,我娶妻求淑女,最緊要大方得體,唔使好靚,最好兩樣都有啦,呢啲可遇不可求。」
另外,祥嫂噚日就冇覆機,唔知係咪太多人打去恭喜佢娶新抱呢?
採訪:卓寶花 攝影:仇志德
朱孝天聯合國歌迷祝壽
朱孝天噚日二十六歲生日,有來自泰國、日本嘅歌迷到咗台灣同佢一齊慶祝,有歌迷邊做木瓜沙律邊跳民族舞;有啲就摺巨型紙鶴嚟祝福偶像。問朱孝天有乜嘢生日願望,佢話:「希望世界別再有災難,世界和平,自己、親友和歌迷都身體健康。」

蕭薔專搶人飯碗
蕭薔啱啱推出咗新唱片《Bella》,佢噚日喺台灣以性感打扮做宣傳,佢話好緊張歌迷嘅反應喎,又成日上網睇歌迷嘅留言,佢話:「新專輯反應不錯,不少網友說我搶歌手飯碗,我之前出書,網友也曾說我搶作家飯碗。」蕭薔貪靚着短裙,所以着咗兩對絲襪打底,但仍然凍到震,活動完咗即趕去後台飲熱飲保暖。

華仔開倉賣戰衣賑災
劉德華今日喺歌迷會所「華仔天地」開倉義賣二手衫嚟幫南亞災民籌款,噚日佢一早就返去歌迷會度執拾衣服,又親自為衣服定價,重揀咗六件佢認為好有紀念價值嘅衣服拍賣,包括佢拍《全職殺手》時着嘅紅色皮衣、攞「世界傑青」時着嘅名牌中式長袍等等。
南紅闊別七年演一場
七年冇正式踏台板嘅南紅,將會喺下個月聯同劉惠鳴及任冰兒喺新光演出《紫釵記》,南紅話平時都有練功保持狀態,所以到時演出應該會有好表現。
據知售票反應熱烈,但係南紅今次只演一場,好多戲迷都要求南紅加場,不過佢就未有考慮。

林子瑄鼓勵創業唱反調
林子瑄、葉文輝(啤梨)同鄧穎芝噚日去銅鑼灣出席一個有關鼓勵創業嘅活動,林子瑄話佢喺沙士期間同兩個朋友喺銅鑼灣開咗間賣少女衫嘅舖頭,不過經營唔夠一年就關門大吉,重要賠租畀管理公司。佢蝕晒啲積蓄之餘,重差啲同好朋友反面。所以林子瑄話吸取教訓之後,以後都唔再搞生意喎。
empty
鄧兆尊(右)與新娘父親齊齊擔任主婚人。
empty
祥嫂
資料圖片
empty
小艾同釣魚郎個仔都成兩歲幾,生得好得意。
empty
蕭薔
empty
劉德華
empty
南紅(中)、劉惠鳴(左)
empty
林子瑄(右起)、葉文輝、鄧穎芝