立法會選舉塵埃落定，4個新任議員將會喺下周三嘅大會上按《宣誓及聲明條例》宣誓。立法會噚日就為新丁們安排簡介會，不過，4人之中得3個現身，究竟邊個無出現？原來就係建築、規劃、園境及測量界謝偉銓，謝偉銓解釋自己唔係大牌，而係去咗北京出席政協會議，所以出席唔到立會迎新活動咯。

區接收羅冠聰議辦

噚日立法會為新任議員安排迎新，上晝係民建聯鄭泳舜，下午就係區諾軒同范國威，至於謝偉銓身在北京無出現。八方下午就見到區軒同咖喱范迎新情況，兩個人分別由座位行出主席台前宣誓，由頭到尾做足，模擬得非常認真。
完成迎新課程嘅區軒同八方講，當選立法會議員對佢都係如履薄冰，加上未宣誓建制派已經大力打壓，佢都唔可以有任何出錯，所以都好認真聽書。佢又話未來會用被DQ嘅羅冠聰之前用嘅901房，直言「重奪議會由重奪901開始」，但噚日就未入得。前議員咖喱范就話，參與迎新係要溫故知新，了解立會改咗議事規則後嘅分別。至於鄭泳舜就話，議會對佢都唔陌生，因為之前成日跟民建聯大佬去立法會見官員，佢都有努力學習宣誓方式，話宣誓好莊嚴，自己會認真看待喎。
而謝偉銓話選舉後翌日，上午去咗北角政府合署同一間建築顧問公司謝票後，急急趕往北京開政協會議，噚晚先返香港。

李八方