最近唔理係商界定係左派，喺阿爺「勸戒」之下，無不大大力出嚟挺煲呔，又話下屆冇人出嚟同佢爭特首，又保證煲呔必定自動當選，原本八方諗煲呔應該好開心，可以印印腳等連任，點知有民主黨中人陰陰嘴笑住話，若果真係冇人挑戰煲呔選特首，佢仲大件事，隨時會俾左派同商界玩死佢！

單打獨鬥　要四圍求信任票

何解？呢個民主黨中人同八方講，北京支持煲呔連任，最好佢自動當選，但唔好忘記，○七年特首選舉加咗信任票，就算只有煲呔一個人參選，到時一樣要投票。
佢話阿爺只係要煲呔做特首，既然佢冇人挑戰，煲呔可以攞幾多選委信任票，阿爺就未必會插手幫佢拉票，以𠵱家阿爺對煲呔嘅政策，一定叫煲呔自己搞掂啲支持票，到時班左派、商界仲唔玩嘢，向煲呔大開條件？若果煲呔唔答應，佢哋到時投棄權票，等煲呔低票當選。反正有四百零一票，定係七百零一票，都係佢做特首，但對煲呔嚟講，就肯定相當冇面。
呢個民主黨人仲話，若果左派、商界班友再毒啲，可以畀夠七百幾個提名煲呔，但到咗投信任票，煲呔就要保證呢七百幾人一定要投佢信任票，唔係有人扭計，投票時得番四、五百票，到時真係顏面何存，仲點強政勵治？

歡迎民主派　最好加陳四萬

所以呢位仁兄話，煲呔求神拜佛民主派有超過一百張選委票，又可以推個候選人出嚟挑戰煲呔，最好係支持埋陳四萬，北京到時一定出手幫煲呔箍票，左派更加唔敢玩嘢，要被迫支持煲呔。所以佢問八方，喺呢個局面下，你估煲呔想有人挑戰佢，定冇人挑戰佢呢？

傳真︰2623-9278
電郵︰[email protected]