周日英超夜場，由兩支近況下滑的球隊交鋒，由西布朗主場鬥韋斯咸。西布朗上場作客阿仙奴雖然輸波，但表現不俗，而且韋斯咸受傷兵問題困擾，所以一於博主隊3連敗後反底，捧主W！（球賽編號：星期日23；有線200及300台11:59pm直播）
西布朗在11月氣勢如虹，擊敗車路士，聯賽4連勝，名列前4，但最近3仗的成績突然直線下滑，全部輸晒。不過，西布朗的表現其實漸見好轉，尤其上仗對阿仙奴防守出色，兩個失球皆來自12碼，其中一球更是對方「插水」。
綜觀今季西布朗的主場成績，尚算可靠，8戰6勝2負，當中兩場敗仗皆是僅輸一球，對手分別是上季冠軍曼城以及今季防守最好的史篤城。此外，西布朗的陣容完整，除了門將賓科士打及左閘列治維要養傷，中場耶高比有望復出；而前線的謝拉、奧丹維治及沙恩朗皆可候命，所以連表現搶鏡的借將盧卡古都要擺後備。

另一邊廂，韋斯咸又再增添傷兵，踢法拚命的防中迪亞美在上場觸傷鼠蹊，至少休養3周，與中鋒安祖卡路爾、翼鋒華斯迪、中場班拿約、迪亞華及左閘佐治麥卡尼等主力一同缺陣，勢將大幅削弱球隊的實力。韋斯咸近4場聯賽1勝3負，其近況之差與西布朗不相伯仲，但韋斯咸今季作客成績不振，7戰僅得2勝1和4負，相信今仗造訪西布朗都冇運行。文：咖喱