由宋仲基、宋慧喬主演嘅KBS人氣劇《太陽的後裔》今晚播第13集，承接上一段，講到劉時鎮（宋仲基飾）同徐大英（陳久飾）有新任務。而時鎮就去醫院搵姜暮煙（宋慧喬飾），點知撞正理事長調查緊暮煙嘅男友，從照片中所見就驚訝發現暮煙男友正正喺眼前，理事長問時鎮暮煙拒絕自己嘅話係因為時鎮嘅話，時鎮即警告佢第一日約會就帶佢女友去酒店，仲叫佢唔好接近暮煙。時鎮去接暮煙放工，點知金醫生就被時鎮迷倒，仲問佢叫乜名，令暮煙又呷醋，暮煙話時鎮點解要同對方打招呼，時鎮即追問暮煙理事長嘅事，暮煙又再扯開話題，時鎮買了禮物畀暮煙，原來係一條頸鏈，仲為暮煙戴上。

時鎮同暮煙喺咖啡店展開約會，而尹明珠（金智媛飾）同大英都有在場，四人約會正式展開，時鎮同暮煙又再拳頭打拳頭，好不溫馨。時鎮同暮煙不時喺大英明珠面前耍花槍，令明珠叫停佢哋，四人約會好不甜蜜，但時鎮佢哋都頂唔順明珠佢哋嘅肉麻，就話走人先。大英同明珠離開，揸車時仲拖實明珠手，明珠電話響起，點知原來係手下打電話來打小報告，話畀明珠聽大英嘅行蹤，令明珠好鬼尷尬，最後大英利用架車自動駕駛功能，借機甜蜜咀嘴明珠。

大英見明珠嘅父親，明珠亦在場，大英話會唔做軍人，明珠父親話答應過女兒唔使佢轉職，點知大英仍然堅持轉職，明珠嬲爆，兩人發生爭執，大英話要得到佢父親認可，唔係因為明珠患病時嘅要求，佢就寧願唔做，明珠即話如果因為自己而令大英變成不幸，那麼佢哋就分手吧。

另一方面，時鎮去咗暮煙屋企睇電影，暮煙話要同時鎮一直回烏魯克，當佢哋睇得入神時，暮煙又收到醫院電話，佢又要走人，時鎮話要留下繼續睇。而時鎮同大英就當VIP嘅保鑣，大英同時鎮講同明珠分咗手，而此時有一個黑衣人急步行近時鎮佢哋，暮煙喺醫院見到救護車，裡面就正正係受咗槍傷嘅時鎮。

溫馨提示：ViuTV今日開台，不過今晚播出第13集《太陽》就唔會喺ViuTV有得睇，今晚8時30分ViuTV已播出《太陽》第1集，仲會有埋繁體字幕兼粵語配音多種選擇。至於大家想追睇《太陽》第13集嘅話，就可以喺《太陽》今晚播出4個鐘後到Viuapp上睇，Viuapp會於播出後4小時後有得睇《太陽》繁體字幕版。