噚日港足勝利巡遊,卻傳出農曆大年初一冇賀歲波睇咁大單新聞,各大報章梗係第一時間公告天下;點知足總董事局部份成員睇完,都對主席梁孔德嗰番有意用「國際青年足球邀請賽」取代賀歲盃嘅言論感到驚訝。因之前足總會議上已講明,賽事可能改為以本地球會邀請外隊頂替,因未有定案所以唔可以對外公佈。
突然「失憶」嘅梁主席噚日就私下同部份球圈人士講,係記者亂寫,一邊話自己冇講過,之後又話只係其個人構思,咁咪即係唔認數!不過,球迷講到尾都淨係想知新年有冇波睇啫。足總發言人噚日就重申搞賀歲盃係有困難,但會繼續積極搵球會做主辦單位,傑志亦初步考慮緊幫手。我求大俠亦問過傑志總領隊伍健,佢話家嘗試搵足球經紀幫手,但成本高,時間趕,搞唔搞得成都仲係未知數。