梁漢文（Edmond）、Super Girls、蔡一傑、梁釗鋒及鄧小巧等，噚晚係灣仔伊館出席「代代傳承博愛心慈善音樂會」， Edmond透露11月會拍葉念琛新片，同王菀之合作：「啱啱拍完劇，上部電影係幾年前嘅《全力扣殺》。」

講到好友任賢齊為新片角色增肥，Edmond笑話最近見過小齊，真心覺得佢增肥好成功：「作為藝人增肥同減肥都唔係少嘢，佢仲咁大幅度，之前我哋一齊去四川做一個電視台節目，我見到佢嘅身材，只可以話係好成功囉！佢食得太開心，我有叫佢唔好食得太過得意忙形，因為減肥好辛苦。」

小齊日前接受訪問自爆有三高同脂肪肝，Edmond聽到好愕然咁話：「吓！其實減肥過程好艱難，每次佢上台都要解釋俾觀眾知，真係好搞笑。」問Edmond願唔願意為角色作出咁大犧牲？佢話：「除非我好鍾意個角色至可以，係好大嘅挑戰，我好多年冇肥，係因為我有keep住做運動，你估我仲係20幾歲油浸唔肥咩？o依家唔做運動真係會賤肉橫生。」

至於Edmond早排去卡拉OK房睇波，唔小心仆親撼傷個頭縫咗37針，噚晚再見佢，疤痕仲好明顯，佢笑話：「最近開始做番運動，條疤就紅咗啲，man咗好多，我可以抗濶戲路。」

精選娛聞，喺晒《娛果》
http://fb.com/appledailyent