抗癌港姐林淑敏(Mandy)今日喺灣仔循道衛理聯合教會國際禮拜堂同圈外男友陳中原舉行婚禮，多位藝人到賀。林淑敏著上雪白拖地婚紗入到教堂，分享心聲時更感動到哭了。

正式成為陳師奶嘅Mandy，同老公喺台上分享感受時話：「我嚟咗香港十三年(來自加拿大)，多得老公照顧咗咁耐，我哋噚晚兩個都失眠，佢係全世界最好嘅老公，多謝老爺、奶奶好好咁照顧我。」

喺交換戒指甚至宣讀誓詞時，Mandy都未見激動，反而分享感受時激動得喊起上嚟話：「朋友問我，嫁老公使唔使要靚仔，我話簡單、老實就已經好足夠。」對於Mandy嘅評價，陳中原揚言值200分，氹到Mandy好開心。

事後被問到有冇生育計劃，Mandy即感觸話： 「可能好困難，因為之前個病仲食緊荷爾蒙藥，但老公好鍾意小朋友，都有諗過係咪虧欠咗對方，之後要睇神嘅安排。」 至於會否繼續拍戲？Mandy笑言： 「會，香港生活比較困難，四百萬嘅樓都係窮人恩物。」