美股上個禮拜五在12000關爭持，跌咗9點收市，但係成功力保12000關，大成交加「長十字星」，今晚仍然可以睇好啲。聯儲局議息對美股唔會有大影響，炒家都係睇實個會後聲明，再「斷章取義」炒作，大形勢短線睇好較着數。
油價同金價嘅走勢幾波動，從大形勢睇，向淡嘅方向仲未轉，不過商品期貨想繼續炒上嘅味道就好濃。
期指呢個禮拜尾結算，撞啱工行（1398）掛牌，美股呢幾日如果靠穩，結算日喺隻工行帶動之下，個市嘅氣氛應該會好好，工行全球招股吸納資金4萬億元，乜嘢紀錄都破晒，全球起哄，如果「一人有一手」，個市應該可以再癲啲，加埋啲地產股或者會借勾地消息推高，呢個禮拜個市應該會好熱鬧、好好炒。

招行C輪9027：招行（3968）上日報收12.12元，突破上市至今高位，圖表顯示，招行已完成橫行整固，時間上有啲刻意，好似趁住工行掛牌前先做場騷，啲買盤嘅手法幾狠，短線應該可以升破13元再向14元嗰邊走。招行上市以來，俊樺第一次推介招行輪，係要睇定啲新輪嘅變化先，知己知彼，咁樣先至可以提高贏面。
招行C輪9027上日報收1.80元，成交1.04億元，幾活躍，槓桿率6.7倍（有效5.6倍），仲有5個幾月先到期，溢價只係3%，抵到爛，對沖值0.82，屬價內輪，正股炒上，9027嘅升幅都會好貼，街貨比例顯著上升，炒家嘅入市態度變得積極，引伸波幅24.9%，略低，隻輪再升，引伸波幅料會上升，加快隻輪嘅升勢，正股升上13及14元，9027應該會喺2.50元同3.40元樓上，正股跌穿11.50元止蝕。
俊　樺