李美慧（ViVi）今日同富商曾文豪舉行婚禮，朝早曾文豪俾咗大叠開門利是接新娘，之後轉到淺水灣舉行註冊。

到場觀禮嘉賓有甄詠珊、陳展鵬、陳志健、李民橋夫婦、楊卓娜、許晉亨、鄭世豪、張彥博、陳爽，楊明、林利、蕭若元、樂易玲同兩個仔、梁婉靜同老公、李綺雯，陳君宜一家三口等。
陳爽受訪時話送咗禮金：「以為喺草地行禮，一對新人決定喺室內進行，可以涼住冷氣觀禮。」佢又透露婚禮過程輕鬆：「佢哋氣氛好輕鬆，令大家都輕鬆，仲聽到曾文豪叫ViVi「乖啲喇」，見到ViVi都感動，佢又多謝自己家人。」陳爽話識咗ViVI十年，當時喺TVB8合作，讚對方好勤力，又識打功夫，鍾意向高難度動作挑戰。

陳爽話之前收到message通知今日舉行婚禮都覺得好快，但ViVi話搵到幸福，好戥對方高興。咁會唔會傳授教仔心得？陳爽話：「唔使啦，佢都好叻。」

精選娛聞，喺晒《娛果》
http://fb.com/appledailyent