聲稱唔選又選嘅前立法會議員馮檢基，今日下午喺爭議聲中登場，去到九龍城政府合署報名參與九西補選，作為縱橫政壇30年嘅老江湖，估唔到阿基竟然為咗要報名參選違例泊車，仲慘食牛肉乾（告票），真係出師未捷荷包先損，至少唔見$320，老貓燒鬚喇！

話說阿基今日搭正三點，帶同幾個助手去到九龍城政府合署報名參選，據佢所講，今日係由佢親自揸車過嚟嘅。當阿基正式上樓報名果陣，八方就發現，佢將黑色座駕泊咗喺街邊位置，車頭個位仲有張由警方發出告票添！八方喺附近行咗一個圈，發現附近都有幾個付費停車場，唔知阿基係咪太趕先會違泊呢？咁嘅情況下，呢張牛肉乾係要要計入選舉開支㗎？

八方正就事件向阿基查詢，但可能基哥仲忙緊報名參選，暫時都未有回應。而阿基報名後上車時，就由助手攞咗張「牛肉乾」上車。

立會補選新聞，《蘋果》一網睇晒
http://bit.ly/appledaily1125