開心媽咪Danise仲有個零兩個月就放產假，佢出名係精明師奶，BB未出世已經成日上親子Blog同其他家長chichat，連買日本奶粉最抵渠道佢都知。前幾日佢上《親子王國》討論區，見某某保險公司嘅sales喺討論區sell教育津貼基金，就好不值咁話：「巧立名目，咪又係供基金。」
我問：「咁你幫BB買咗未呀？有冇格過邊間最抵買？」
「買基金？BB有個咁精明嘅阿媽幫佢投資，使乜靠基金經理？」
「慌你唔係開咗個月供股票戶口，幫BB儲教育基金咩！」
「醒目！我格晒價，喺中銀供股票最抵，又可以碌卡供，信用卡積分可以換現金券。」
「咁你供邊隻股票呀？滙豐（005）定A50中國基金（2823）？」
「兩隻都唔係，我供交行（3328），滙豐入股咗交行，曾淵滄都話啦，買交行咪即係買第時嘅滙豐。敏妮我知你都有供股票，仲係供滙豐㖭，但你開始供嗰陣，滙豐都唔過100蚊，我家陣先嚟供，供成年先得一手半手，供唔過。」
「係呀，所以我咪趁轉銀行，供過第二隻股票囉！先前碌滙豐信用卡，喺滙豐銀行供滙豐股票，年年將啲積分換油券畀男朋友當禮物，點知今年開始唔可以碌卡供，我第一時間剪卡。」
「咁你準備點？」
「先將啲滙豐股票轉番自己名，費事收息嗰陣要畀手續費。跟住同你一樣，轉會過中銀，但就轉供港交所（388）。」

長遠問鼎「股王之王」

「港交所前景好過交行咩？」
「咪咁緊張，香港咁多隻股票，前景好嘅點只一隻，投資要睇自己個組合，我都有滙豐喺手，再供就唔會揀銀行股嘞。供港交所係因為佢可以分散風險，每次大牛市都有唔同炒作主題，你點估到下一浪炒乜？但無論炒乜都好，用嚟炒作嘅『廚房』就一定撈到油水，最重要係港交所喺香港做獨市生意，冇人同佢爭，愈多公司嚟香港上市，佢嘅生意就愈多，我睇好港交所長遠會係股王之王。」