要想喺國際友賽搵食，千祈咪諗住向冷門戰果埋手，但亦唔代表無機會「刀仔鋸大樹」；捉4場熱門波膽5注飛過關出擊，10蚊注，瞓醒第二朝戶口隨時多咗幾皮嘢！
周三晚友賽，北歐國家挪威主場對足球王國巴西，牌面睇巴西梗係高啲，但森巴兵團新帥鄧加，今仗選入大量新人，無晒名牌球星隨隊。
相反，挪威教練夏拉廸就重召咗曼聯前鋒蘇斯克查，其餘人腳亦係最強人選；再睇埋對賽往績，挪威對住巴西原來未輸過，呢場其實無得輸，熱門波膽各一言和可以出擊。
同晚亦有列支敦士登呢支「魚腩」部隊登場，主場對住喺世界盃決賽周未失過一球嘅十六強球隊瑞士；呢場瑞士贏波就梗㗎喇！
而且可以追捧佢哋嘅防守力，只需要喺佢哋入到幾多球呢方面着墨，就搵到波膽；瑞士贏3:0最似樣，話晒都係友賽，無咁多「其他」波膽出現嘅。

瑞士贏3:0最似樣

南美方面亦有兩支球隊友賽「拍跳」，智利主場對住哥倫比亞；兩軍自從85年以來友賽對陣四次，其中三次喺智利主場都打和收場，兩次開1:1，所以呢場1:1波膽，用嚟過關之餘亦要「例飛」出擊。
另外，自由盃決賽次回合，國際體育會首回合已作客聖保羅贏2:1，呢場仍然要讓，肯定有計，上盤單W都無走雞，波膽就可以博國體會贏2:0；畢竟聖保羅已經有借將射手奧利華拉離隊，返咗去西班牙貝廸斯，入球力肯定有所削弱。文：華度