05年港姐冠軍葉翠翠忽然富貴,自稱炒股有道,喺港股熊市下,過去一年依然勁賺,夠錢買3000萬豪宅,羨煞旁人。翠翠炒股咁掂,惹嚟一眾散戶請教炒股良方,Sfcarson話:「既然翠翠炒股咁叻,又靚女,強烈要求『法巴』(法國巴黎銀行)高薪請埋翠翠入去做嘢,同珠珠趙海珠一齊做『法巴雙妹嘜』,到時一定天下無敵。」
咁好嘅提議,唔少網友support,Bb123123_2就期待「新Twins」嘅出現。不過,Superkid指:「家吓珠珠已經升咗職做董事,坐房兼有埋秘書,翠翠幾時係佢嗰皮吖!」現時珠珠係法巴香港零售衍生產品部聯席董事。