樂基兒（Gaile）上月尾喺美國加州，同從事有機食物網生意嘅圈外男友Ian Chu再婚(新聞連結： http://bit.ly/2gFSGYL )，婚後不久，Gaile已返港復工，今晚就明艷照人咁到中環出席時裝活動，講到前夫黎明可有送上祝福？Gaile話：「好似冇，因為一直用緊美國嘅電話，冇留意到香港嘅電話，有邊個曾經打俾我。」

6時許，着上吊帶低胸裙嘅Gaile到場，記者即問佢去咗度蜜月未？Gaile話：「未呀，婚後病咗成個禮拜，年尾先去safari(野生動物之旅)渡蜜月，想去接觸吓野外森林同睇動物。」Gaile話婚後將與老公在港定居，感覺就冇乜唔同，只係病咗啫。仲話工作好忙，好似活動後，佢就要飛去上海，所以都要叫自己放鬆，可能太過緊張，婚後先病。

追問Gaile有冇造人計劃？佢話：「冇咁嘅打算，順其自然啦！唔會刻意去計劃，冇特別去嘗試，亦都唔想俾壓力自己。其實除時都可以要(小朋友)，但真係冇特別去試囉。我哋有冇小朋友都冇所謂。」

講番婚禮最感動嘅部份？Gaile稱：「最感動係見到啲朋友由倫敦、美國、澳洲、香港特登飛去參與，因為嗰個地方真係好遠，亦收到好多fans嘅祝福。(愛的宣言？)當時冇呀！因為好熱，儀式都係兩分鐘左右，計劃中(儀式)都係好快嘅，因為想好好咁享受，而唔係要搞一個派對囉。」問到可會再約香港朋友食飯慶祝？佢話：「應該唔會，因為都慶祝咗一段時間，都已經結咗婚啦！」