近月兩位新聞人物——曾志偉同喺無綫頒獎禮上話「山頭主義」唔好嘅汪明荃（阿姐）、今晚（26日）同薛家燕、吳業坤等現身電視城錄影《吉祥金犬耀保良》，兩人仲一齊受訪。

阿姐嘅「希望山頭主意少啲啲」嘅言論，除咗代表無綫台前幕後嘅心聲之外，亦都係唔少打工仔嘅心聲，但家英哥羅家英就嫌阿姐講得唔夠激，日前佢出席活動時話：「山頭係要去拜，唔同山頭，代表以前有好多大王霸山頭，TVB好多寨主，嗰啲係賊頭……」咁阿姐又點睇呢？

阿姐話，台慶頒獎禮當晚佢講嘅「山頭文化」，係隨心講，唔係照稿讀。咁公司有冇Scan過？當然都係冇嘅。邊個敢呀？志偉都話：「公司冇人夠膽審阿姐喎！」咁你撐唔撐阿姐呢番言論？梗係buy啦：「係佢先至講得到！」

喺台上講呢番言論時，鏡頭見一眾藝員排排企都唔敢俾反應，得家燕姐笑咪咪拍手。阿姐話，事後唔少同事都好多謝佢敢言，但佢話唔覺藝員當時唔敢俾反應喎：「佢哋喺度拍手同笑0架！」

阿姐話，佢覺得新管理層係有heart嘅，見公司新增好多頻道、「跨國合作」拍攝等等，明白公司係想將香港文化帶去唔同地方，更加希望高層可以帶領公司走向第二個50年，想做得更加好，曾志偉突然爆一句：「係想將山頭文化做得更好咋嘩？哈哈！」

薛家燕就話:「山頭文化好多大公司都有，如果係良性競爭係好事，冇競爭冇進步，大家融合、互相體諒，就好似我首歌，《皆大歡喜》就好。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent