權健上年由科隆引入莫迪斯迪,呢位法國前鋒亦都無令人失望,聯賽短短上陣八場就轟入七球,仲有三個助攻,係球會攞到聯賽季軍嘅一大功臣。不過法國《隊報》就話,莫迪斯迪想離隊搵新挑戰,仲想同權健提早解約,轉投俄超球隊莫斯科火車頭。莫迪斯迪嘅經理人亦都證實,雖然仲未收到火車頭嘅正式報價,但莫迪斯迪本人傾向走人。
中國傳媒就話,莫迪斯迪自從禮拜二開始就無參加操練,而權健就證實佢係以私人理由請假,令離隊嘅傳聞甚囂塵上。莫迪斯迪份約到2020年先完,不過佢已經委託律師團隊同權健傾有關解約嘅事,仲想追番1,000萬歐元嘅薪酬差距。原來莫迪斯迪𠵱家份約係同權健嘅前任高層簽落嘅,同權健𠵱家拎住嗰份唔同,所以就有薪酬差距,意味莫迪斯迪收少咗1,000萬歐元。佢就想用呢個理由同權健解約。
其實權健今年嘅表現唔算好好,聯賽𠵱家都只係能夠排喺第九位,下季隨時冇得打亞冠。雖然柏圖今季繼續有出色表現,但如果冇韋素同莫迪斯迪,球隊話唔定亞冠八強出局。