【新增內容】

用微波爐叮溶朱古力
用刀切酥皮冇咩碎
喺碟嘢食前面鋸齒刀添加「鐵質」
焗好熱辣辣嘅蛋糕，唔使攤凍，即放入雪櫃……

以上「資訊」由謝霆鋒早前拍嘅《十二道鋒味》(新聞連結： http://bit.ly/2mRQDHa )，噚晚高登King Jer喺facebook貼一條「霆鋒chok爆烹飪合集」，睇吓霆鋒喺節目點煮嘢，見佢整雞蛋仔，畫面睇到霆鋒似乎落得太多蛋漿，一用電爐夾埋就漏晒啲蛋漿出嚟，點知整出嚟嘅成品好似塊「抹布」咁，有網民話「好懷疑份雞蛋仔未熟」、「佢自己都忍唔住吐番出嚟」、「認真嚟講啲蛋漿根本唔使咁多」及「佢自己忍到唔笑先好嘢」。

而片中又戴護目鏡炒菜、拎嚟入焗爐撞咗埋爐邊、整叉燒分子料理賣相似雞子咁，網民紛紛留言質疑霆鋒煮藝。

謝霆鋒《鋒味》專頁喺King Jer喺facebook留言：「12道鋒味嘅剪接真係要向King Jer學習！咁把刀就肯定唔會唔連shot！大家如果想睇霆鋒堅煮，俾多啲意見佢，甚至點佢煮多舊魚同麻腩飯，請follow 謝霆鋒《鋒味》頁慢慢睇佢煎蒸煮炸燜燉焗啦！」即有網民突破盲點反問咩叫「堅煮」，係唔係承認有「假煮」……亦有人覺得呢個回覆係一個「關公災難」……無啦啦踩去人哋專頁，叫人follow!

有網民就覺得冇可能整雞蛋仔整到成張檯都係蛋汁，感覺好污糟，亦有人覺得霆鋒磨刀手勢唔太正確，怕佢批到自己隻手，仲要喺塊扒上面磨把鋸齒刀，問霆鋒磨嚟做乜，笑言牛扒鐵質都高，啲「鐵粉」跌晒落去，仲有人問佢煮威靈頓牛排(Beef Wellington)時(新聞連結： http://bit.ly/2niJBal )，佢用攪拌機打碎晒啲蘑菇，霆鋒用紙巾吸乾啲碎蘑菇，有網民就問：「解釋下點解會試圖用紙巾吸乾啲蘑菇，而唔係用廚房紙或毛巾呢!?」

呢件事仲未完呀，連環境保護署嗰隻大嘥鬼，都喺facebook專頁抽水話「就算淋晒嘅雞蛋仔，都一定要食晒佢㗎！」擺明抽水，笑霆鋒煮雞蛋仔嘅未熟。至於香港插畫家貓室，就整咗佢隻貓貓「癲噹」揈蕉嘅gif，超級得意。（相關連結： http://bit.ly/2nP80r8 ）