陳美齡今日喺灣仔為其撰寫嘅新作《人生的38個啟示》舉行巡迴簽名會，吸引唔少粉絲到場，當中有個小妹妹，除咗話識得佢啲日文歌之外，仲向佢獻吻，搞到陳美齡忍唔住話好冧！

講番呢本新作，陳美齡表示銷情反應好好，已經要再加印。提到佢未得老公金子力同意，用咗老公一張舊相，唔知佢老公有冇唔開心？佢笑住話：「冇問到，佢仲未睇到，我同佢講係中文，佢都唔識睇，但係日文都有啲漢字，佢要睇都可以睇到5、6成，佢都識少少廣東話，不過全部都係讚美我嘅說話，例如好後生、好靚、好好食。」

今次用中文書寫，陳美齡直指有難度，佢話：「平時用日文、英文寫，今次用中文寫，初時有啲擔心，但可能中文係自己嘅語言，寫出嚟又覺得親切，其實以前讀書，除咗中國歷史、社會係中文教，其他所有科目都係英文，所以我對中文有少少自卑，不過大家都話寫得幾好，對我係好大鼓勵。」

佢又提到上一本書《50個教育法，我把三個兒子送入了史丹福》深受內地歡迎，所以經常要到內地出席分享會同簽名會，並正計劃去台灣宣傳呢本書，佢仲透露現時同日本出版商合作，12月推出另一本以教育為題材嘅書籍。好少時間陪家人，老公有冇詐型？佢笑笑口咁話：「少少啦，不過佢都好珍惜自己嘅自由時間，約朋友飲酒，我就陪下媽咪。」