黃秋生同姬素．孔尚治（Crisel Consunji）主演、陳小娟執導嘅電影《淪落人》，日前喺意大利烏甸尼遠東電影節得到好成績，秋生獲頒「傑出成就金桑獎」，電影就奪得「觀眾票選金桑獎」同「影評人黑龍大獎」。三人噚日由意大利返港，雖然坐完長途機，但笑容燦爛，秋生用「好神奇」嚟形容今次行程，仲即場拎住「傑出成就金桑獎」同兩位拍檔合照。至於其餘兩個獎，就要等大會刻好名後再寄來港。

可能分紅更多

陳小娟坦言冇諗過可以攞獎，一心係去慶祝秋生攞獎，秋生聽到即笑住話：「唔好玩啦！兩個電影獎，有一個仲係大獎，笑到八萬咁口，我都嚇到跌落地。」講到得到傑出成就金桑獎感受，見慣大場面嘅秋生都忍唔住話：「好犀利，大會有句宣言叫『為我們的王鼓掌』，嗰刻成三層樓咁多人鼓掌，從來未試過，用感動都難以形容。」陳小娟仲大爆秋生當時心情緊張兼眼濕濕。

陳小娟話如果將來再有機會同秋生合作，一定要畀片酬，秋生話：「可能𠵱家（分紅）收得比以前仲多，演員同新導演可以轉吓呢個模式合作，如果你覺得個劇本得，你都會拍啦！可以考慮當自己有份投資。」
撰文：馮仁昭