【英超出櫃】每隊波都有基或雙性戀 迪尼：有人認 實有100人跟住metoo
蘋果日報 2020/06/15 14:40
英超同性戀雙性戀屈福特迪尼
屈福特前鋒迪尼話，每支足球隊都至少有一位同性戀或者雙性戀。
英超球星個個人工高又有錢，可以話係唔愁身邊冇女人，不過屈福特前鋒迪尼就喺英國BBC嘅訪問表示，其實每支足球隊都至少有一個球員係同性戀，或者係雙性戀，唔通佢哋已經看破紅塵，對女人呢家嘢厭倦咗。
31歲嘅迪尼，之前怕將病毒傳染畀自己五個月大仲有呼吸困難嘅囝囝，所以講明唔會參與復季，但他最終都抵受唔住輿論，今個月初首次參加球隊操練。已經有家室嘅佢，就話大家平時都會將自己嘅性取向保密，因為唔想高調做「出櫃」第一人，承擔晒啲責任。他話：「我敢話每隊波都至少有一位球員係同性戀或雙性戀。」
迪尼仲講，有一位球星出嚟承認時，其他人都會勇敢公開承認：「我真係信，如果有個人企出嚟，頭一個禮拜至少會有100人出嚟講『me too』，只係因為佢哋唔想成為同性戀嘅封面。依家經歷緊『彩虹運動』（疫情），會係最好嘅時機。」英超即將重開，屈福特目前以29戰27分排喺第17位，分分鐘有降班危機，而迪尼喺今季喺英超上陣18場，取得6個入球。