基本法委員會會即將換屆，一如八方早前所言，譚惠珠接替梁愛詩做副主任，梁美芬即將升呢小護法，其他港方委員人腳，基本上冇變。

但查實除咗梁美芬，政界流傳早前仲有一人曾經「榜上有名」獲薦新護法，結果最終名單未見其名，似乎已請有關方面食檸檬，從而亦令梁美芬穩守「新丁」之席。

到底邊個咁巴閉敢向阿爺Say no？據知就係前律政司司長袁國強，雖然喺「一地兩檢」安排下，中央冇接納佢嘅專業意見，但佢冇向外反枱兼捱義氣到本年一月至離任，對中央嚟講都算唔話得，難怪阿爺覺得要「論功行賞」。

但既然袁國強離開熱廚房，係為咗重操故業搵真銀，有政界花生友話呀，基委會不時要開會，唔好忘記對大狀而言，時間就是金錢.....加上如果有基委會呢個角色，對於重操故業嘅袁，真係唔知是福是禍，咁又唔怪得佢對中央嘅好意只能心領喎。