【失蹤人口】56歲「孟波」周文健珠海搵食 定期返天水圍探85歲爸爸
父親節城市獵人孟波周文健
現年56歲、憑大隻佬形象賣啤酒喺香港走紅嘅周文健(Michael),早前離開香港娛樂圈,喺外地發展,近年轉往澳門同珠海繼續搏殺,不過孝順仔嘅Michael不時都會返香港,探望住喺天水圍、現年85歲嘅爸爸周國換。Michael話老竇後生嗰時係運動健將,北京大學o依家仲有周爸爸當年100米跑11秒嘅紀錄,喺當時嚟講真係好犀利。
周爸爸年輕時曾從事飲食業,喺中環經營潮州菜館,幫襯嘅有唔少達官貴人,周爸爸話:「鄭佩佩、李麗華都有嚟幫襯,我賣啲翅(魚翅)好似筷子咁粗。」但係Michael話自己冇機會試過食,因為嗰時移民咗去加拿大。
【Call齊街坊阻兒子入行】
重提當年,原來周爸爸好反對個仔去拍戲,Michael話當時讀完書返香港,之後話要去拍戲,點知爸爸就即刻call齊隔籬左右啲親戚朋友一齊阻止,周爸爸話:「因為我嘅思想係咁諗,你真係拍到好出名,好似李小龍、成龍,根本香港有幾多個啫?如果你普普通通,我話好難搵食,不如你跟我去學做生意,我話你仲輕鬆啲呀!」可惜講唔掂個仔,Michael堅持入行,仲喺1986年拍咗第一部戲《神探朱古力》,直到80年代尾拍咗生力啤廣告,令佢有更多電影拍攝機會。
Michael為咗俾爸爸了解自己嘅工作多啲,喺入行十多年後,更試搵爸爸演戲:「老竇成日話拍戲好容易之嘛,拍戲啲人傻嘅,睇戲啲人更加傻,明知假嘅都睇。好唔鍾意我去拍戲,於是我就搵咗佢去客串,嗰時拍《孟波》,我搵咗佢去做趙世百,外型打扮都好似趙世曾先生。我老竇後生同趙先生都有幾分似。」
周爸爸講番當日拍戲情景,佢話原來演戲唔容易:「要好多嘢配合,咁坐又唔啱,咁坐又唔啱,硬綁綁呀,呢個工作唔係我做,拍戲真係好難。不過如果再揀一次,我都係會再叫人勸佢唔好入戲行。」
【你見唔到有白色嘅地方】
周爸爸講到Michael細個時好曳:「真係好曳,玩完返嚟,周身污糟邋遢,白色嘅校服,你見唔到有白色嘅地方…我最緊要希望佢一定要讀書,好彩佢都讀得到,讀到大學畢業,如果讀唔到我真係好失望囉。」
身邊嘅Michael話係為咗爸爸去讀書,當年佢喺大學讀心理學畢業。對於爸爸嘅印象,Michael話似一個每月都會出現嘅聖誕老人:「當時我覺得爸爸係一個每個月尾佢會寄錢過嚟,好似聖誕老人嘅爸爸咁囉。」雖然有一定經濟能力,不過Michael話爸爸應使則使,每次出去食飯都叫得剛剛好:「食晒我仲喺度餓緊,佢就點都唔會再嗌嘢食喇,佢話得喇夠喇,跟住等咗10分鐘之後,真係夠喎,覺得飽。但係我要餓10分鐘囉。」
講到今日父親節會點慶祝,周爸爸話:「佢話18號過嚟,同我去慶祝喎,我唔知點樣慶祝,我唔知呀!」
採訪:何永寧、懷鈺
攝影:陳俊強
攝錄:馮峰、廖達燊
後期:Roy
周文健同太太婷婷就算依家喺珠海住,一得閒就會返香港陪爸爸。(陳俊強攝)
85歲嘅周父,喺父親節希望一家人齊齊整整食餐飯,唔使有太多驚喜。(陳俊強攝)
當年周父叫晒啲親友反對Michael入行拍戲。(電影《孟波》劇照)
1996年Michael拍呢套《孟波》就搵爸爸扮黑幫大佬。(電影《孟波》截圖)
Michael話爸爸似趙世曾,你又覺得似唔似?(電影《孟波》截圖)
周父周國換後生嗰陣好睇得同好跑得。(圖片由被訪者提供)
Michael細個唔係成日見到爸爸,覺得爸爸似聖誕老人。(圖片由被訪者提供)