又一位名將之後登上職業足球舞台發光發熱喇！周四晚上演嘅歐霸盃J組賽事，德甲球隊哈化柏林主場對瑞典超球隊奧斯達辛斯，德國傳奇前鋒奇連士文嘅囝囝莊拿芬奇連士文替哈化柏林把守最後一關。並喺臨完場前，勇救對方隊長諾尼嘅12碼，幫哈化柏林保住1:1和局，認真抵讚。

身高6呎4吋，今年20歲嘅莊拿芬奇連士文，係美國U-20成員。今年暑假，由美國遠赴柏林試訓，成功得到佢人生第一份職業足球員合約。之前佢已經喺打緊德國第4級聯賽嘅哈化柏林青年隊，出過六次場。今次就把握平時聯賽嘅正選門將查斯甸休息，而二號門將卡夫達又抱羔缺陣，替哈化柏林成年隊上陣嘅機會。雖然哈化一早出局，但莊拿芬一個神救，都叫做為哈化嘅歐霸盃旅程，劃上完美句號。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM