NBA頂級控衞正面交鋒!史堤芬居里(Stephen Curry)周二帶領聯盟一哥勇士,出戰由基斯保羅(Chris Paul、CP3)領軍嘅快艇,勇士以110:106贏波錄十連勝。兩大控衞同得27分,但居里有次進攻搞到CP3尷尬倒地睇住佢入波,個人比拼起碼都贏點數啦。
勇士喺賽前已經穩奪西岸冠軍,不過話晒佢哋喺上屆季後賽首圈就係畀快艇淘汰,周二再對壘一於唔留手,務求盡快鎖定埋常規賽冠軍。日前《ESPN》做咗個NBA控衞排名,CP3力壓居里排第一,雖然佢喺今場波都攻入27分兼有九次助攻,但佢都係俾居里搶晒鏡。