今年香港電影金像獎已經辦到第38屆，頒獎日期已經定咗喺4月14日，喺尖沙嘴文化中心舉行。第一輪入圍投票亦已經展開，先選出入圍名單。近日金像獎選民都已經收到一份小冊子同投票表格，畀佢哋揀選出心水嘅最佳電影、導演、男女主角同男女配角等獎項嘅入圍提名。

今年有54部合資格嘅電影參選，較受矚目嘅電影有潘燦良、吳鎮宇嘅《逆流大叔》，袁富華、姜皓文嘅《翠絲》、陳果導演嘅《三夫》同黃秋生主演嘅《淪落人》，唔少得嘅當然係周潤發同郭富城主演嘅《無雙》。

有份主演《翠》片嘅惠英紅，電影公司幫佢報名參加最佳女配角一獎，反而《翠》片冇報名女主角，可能電影公司覺得套戲冇女主角，或者惠英紅報女配贏面較高。另一方面，初登大銀幕嘅視后胡定欣，原本諗住《逆》片報名最佳女配角，不過最後「升呢」報咗女主角，反而同劇嘅余香凝只係報女配角，相信都係策略問題。事實上睇番今年嘅報名名單，定欣入圍女主角嘅機會都幾大。

另外，第38屆金像獎嘅維基顯示，主持人會由鄧麗欣同前度嘅方力申「擔任」。不過金像獎方面就回應話事件應該係網民一廂情願寫上去喎。

精選娛聞，喺晒《娛果》 http://fb.com/appledailyent