曾煲呔引薦八大猛人入行會，果然有實際效果。話說早前有議員提過，話本港銀行雖然賺好多好多錢，但為咗更慳皮，仍不斷削減分行，令到普羅市民好唔方便。呢個咁民生嘅議題，大家都想討論吓，於是喺行會新貴兼立法會銀行界代表寶哥哥李國寶嘅穿針引線之下，班尊貴議員本來有機會喺明日同三家發鈔行嘅高層見見面，並可當面提出問題，睇睇班賓架點就銀行刪減分行嘅事解畫。

銀行界嚴陣以待

既然由寶哥哥出馬發英雄帖，銀行公會自當嚴陣以待，三家發鈔銀行均會派代表出席，包括身兼銀行公會主席嘅中銀香港副董事長兼總裁和廣北、滙豐銀行執行董事王冬勝，金管局亦證實會有代表出席。銀行公會甚至借出位於中環太子大廈嘅例會場地作為同尊貴議員會面之用。
點知，寶哥哥喺立法會嘅號召力，似乎遠遠不如佢喺銀行界，雖然佢一心想搞好立法會同班賓架嘅關係，但聽講六十個尊貴議員中，應承出席聽朝早個會議嘅，只有劉慧卿、陳偉業、何俊仁同曾鈺成四個咁多；唔計噚晚起程往歐盟同美國嘅五名立法會議員，出席率只係七個巴仙多啲，呢個比率，足可「媲美」寶哥哥喺立法會嘅出席率。

選民要落足眼力

銀行削分行，其實同科技進步有關，用電話用網絡已經可以做到大部份交易，所以好多人無謂去銀行排隊，不過有啲公公婆婆唔識用電腦，而佢哋又正正係銀行想趕走嘅客，關閉分行好似變得理所當然咁，如果再冇一啲社會壓力，閂得更快，銀行界亦會多咗人失業；但係，點解班尊貴議員反應咁冷淡呢，各區選民真係要睇睇。
至於寶哥哥首次發功，銀行界畀足面出席，雖然班議員唔睬佢，實在佢已經贏晒，你唔嘈，銀行就啱晒合尺，唔好唔記得，寶哥哥係銀行代表，自己亦有間東亞。


爆料熱線：29290000、27860099
報料傳真：26239278
報料電郵：[email protected]