新年係唔少人買新衫嘅好藉口，但對住喺海洋公園嘅大熊貓嚟講，每個星期都好似過緊新年咁開心，皆因有一班護理員不停為佢哋絞盡腦汁諗新玩具，引佢哋做運動keep fit，先可以保持健康體魄。
喺海洋公園做咗39年嘅動物行為及環境豐容經理阿Paul吳乃江，主要為園內動物做環境豐容項目，負責照顧大熊貓，引發佢哋嘅自然行為，亦都方便做醫療檢查。
阿Paul話大熊貓嗅覺靈敏，玩嘅嘢都同味道有關，好似樂樂咁就零舍鍾意有味嘅毛巾，會將西柚、檸檬等氣味抹喺上面，令佢四圍行搵嚟玩，刺激腸臟蠕動，自然健康啲；又會整啲放有食物嘅玩具，令佢哋思考點先可以拎啲嘢食出嚟，激發覓食本能。佢相信有足夠嘅運動，係佳佳點解可以成為最長壽大熊貓嘅原因。

1月入場人次按年升逾30%

阿Paul提到當年要負責教安安佳佳閉氣照X光，「不停輪流撳兩邊鼻，feel到佢閉氣就吹哨子同佢講做得啱」，短短60日就學識。佢又提到佳佳好怕水，就算係最鍾意食嘅蘋果，一放喺水盆上就掂都唔掂，結果要用花灑喺佢食嘢嗰陣做人工降雨，慢慢先克服到呢個陰影。
大熊貓咁得意自然多人嚟探。受南港島綫通車、40周年優惠票及農曆年假帶動，海洋公園上月入場人次按年升超過30%，行政總裁李繩宗話扣除活動及假日影響，增幅仍有雙位數，形容係超過預期，但唔可以話一天光晒，仲要繼續努力。

李八方