曾志偉、蔡卓妍(阿Sa)日前喺中環宣傳電影《GoodTake》，呢部戲係志偉監製，搵咗自己個仔曾國祥、黃精甫等合共5個導演，每人負責一條短片，每套短片風格都好唔同，包括驚悚、親情小品、黑色幽默。其實呢部戲已經拍咗兩年，但拖到呢個月先至上畫。

志偉搵咗蔡卓妍(阿Sa)、苗僑偉(三哥)、周柏豪、葉童、張兆輝、盧海鵬同林雪等幫手，阿Sa同三哥、馮淬帆(緊哥)、盧大偉(David)主演其中一個黑色幽默單元《嚇鬼》，而呢套更加係盧David嘅遺作，阿Sa話第一次同馮淬帆合作，當年嘅《精裝追女仔》到o依家都好深刻印象﹕「我一見緊哥就叫佢做『收縮水』，但佢好Cool，唔係好埋我。」阿Sa仲話拍戲時充滿歡樂﹕「唔使埋位時就同盧David、三哥一齊食嘢，得閒又講吓爛Gag。」

而今次退居幕後嘅志偉，就讚自己個仔曾國祥好有個人拍攝風格，佢搵咗周柏豪、方中信同葉童等主演驚悚單元《水泥》，志偉笑話﹕「佢有好多想法，做導演好過做演員，佢估唔到會拍一套咁嘅題材。我俾佢自由發揮，唔想因為自己太商業，影響佢嘅創作。」