梁家輝今日以「國寶守護人」嘅身份，參加喺灣仔舉行嘅香港國際影視展中探索節目《國家寶藏》嘅推介會。

梁家輝喺會上分享拍攝收藏於故官博物館當中，號稱「中華第一古物」，一個古代石鼓嘅拍攝經歷，當大會播出拍攝片段後，聽到片段中自己嘅普通話發音，家輝哥笑指睇到毛髮竪起，不過司儀陳芷菁大讚家輝哥發音標準，家輝哥話今日現身係肩負重任，要推介節目俾大家洽談購買播放版權，而免得大家聽得一頭霧水，所以會用返廣東話介紹。

以往未接拍過資訊性節目嘅家輝哥話：「我未試過有8億觀眾，今次係用輕鬆手法介紹博大精深嘅文化，非常有得著。」當現場有人提議下次可以用喺香港嘅文物國寶作題材拍攝時，家輝哥笑言：「我都係流落香港嘅國寶。」

家輝哥今次喺節目擔任嘉賓主持兼守護人，佢指自己80年代時喺故宮逗留一年拍戲，經常遊走故宮，但係就從未見過自己守護嘅國寶「石鼓」：「石鼓一共有十個，上面刻咗第一代漢字，今次令我加深漢字文化認識。」家輝哥指今次節目係一道打開國家文化嘅門，往後有更多國寶題材值得拍攝。

精選娛聞，喺晒《娛果》
http://fb.com/appledailyent