花樣年控股(1777)招股進行中,市場反應似乎都算唔錯,不少散戶都有玩玩孖展認購。問他們有無諗過抽民生銀行(1988),兩隻相比之下,他們認為民行唔係唔好,但係花樣年有一班富豪撐場,估計唔係省油的燈,而且前排恒大地產(3333)首日上市表現有辦你睇,以咁樣衡量的話,似乎對花樣年感覺良好。
星俠一向不太熱衷抽新股,姑且同散戶閒聊,自己就唔會入票抽。其實,我比較關心銀行「水浸」得好緊要,簡直同內地粵北旱情成反比!銀行體系總結餘下周就突破3000億元,咁大筆錢,斷估唔係純抽新股,其去向將影響大市;可能美國總統奧巴馬訪華,市場會借勢炒人民幣升值,對滙率敏感的股份或成焦點。