何超蓮今日喺佐敦出席日式料理開幕，打趣謂係代表阿媽出席：「呢度老闆係我媽咪個朋友個仔，我做代表嚟支持，我都鍾意食日本嘢㗎。」依家何超蓮都係食肆老闆，仲話趁機嚟取經：「依家生意都算幾好，除咗服務之外，食物都有進步。」何超蓮話預半年左右回本：「依家開咗幾個月，都算交到功課，我都想開分店，做飲食最緊要都係維持口碑同埋有回頭客，我對我哋嘅食物有信心。」

近日台灣人為咗是否應該用不銹鋼飲管飲珍珠奶茶，同埋不銹鋼飲管嘅衛生問題爭辯不休。但超蓮就話，決定嚟緊餐廳會用不銹鋼飲管：「雖然成本高咗，但塑膠真係好唔好，我哋仲買咗個消毒機返嚟洗，保證啲不銹鋼飲管好乾淨。我哋連外賣嘅紙盒都係可分解環保紙，雖然嗰樣係核突啲，但都係想環保啲。」

超蓮仲笑指好多客人慕名而來，有啲會同佢合照：「試過有人打嚟搵老闆娘，我覺得自認老闆娘好尷尬，跟住我話『佢唔喺度喎』咁囉。」

問到爸爸有無掛住佢啲麵？超蓮話：「我有整少少湯佢飲囉，佢日日都做物理冶療，又要食醫生嘅diet，唔想畀佢食咁多影響佢個餐單。」至於父親節，佢就話例牌會買蛋糕同食飯慶祝：「我哋好奇怪，父親節、母親節都要買蛋糕，仲要指定嗰個款，不過媽咪唔食㗎，佢淨係鍾意隻色。」

精選娛聞，喺晒《娛果》
http://fb.com/appledailyent