剛周三2014年元旦日賽事，柏寶出盡風頭共贏四場，今期佢貴精不貴多，只策5駒上陣，但當中仍不乏機會馬，有力延續旺勢。柏寶話明佢對鄭廐「愛歡笑」好有期望，唯一是擔心隻馬漏閘，喪失爭勝機會。
柏寶進一步解釋，佢話「愛歡笑」嘅質素喺三班非常惡，不過隻馬出閘唔穩定，上仗久休復出便出閘滯立，否則豈止後上第五，柏寶又話「愛歡笑」熱身後狀態有進，今戰增程跑沙田1600米乃贏馬路程，希望佢出閘醒醒目目，可以繼「信心出擊」後，再與鄭俊偉齊步入凱旋門。