謝賢同狄波拉嘅寶貝女謝婷婷，上年5月喺溫哥華完成大學課程回流返港之後，經常坐住老竇座駕四處逛，身邊男伴如走馬燈，而且同老外仲似乎特別有緣。
大前晚7點幾，謝婷婷又再出動，着咗件輕便deepV桃紅衫襯牛仔褲嘅佢，同1男1女友人現身中環ifc，男友JayAlexander就未見影蹤。婷婷似乎對ifc瞭如指掌，好似導遊咁向身旁兩位友人指指點點介紹一番。
婷婷行行吓，見到兩名高大後生又靚仔嘅老外朋友，一見面就好鬼熱情咁先錫面再擁抱，婷婷同兩名老外密密斟，將同行友人當透明，擺明有異性冇人性，所以佢兩個朋友好冇癮咁自己走咗去。

其間有商場保安發現有記者，即向婷婷提水、大嗌「Miss！Miss！」婷婷惟有好無奈咁同兩名靚仔講拜拜。
被撞破好事自然影響心情，婷婷走得好匆忙，就連白色胸圍外露都唔知。上月婷婷都曾經俾本報影到當街撩老外傾偈，睇嚟佢真係冇老外不歡喎。