佢透露，公司向新加坡鑽石交易所攞貨，可以慳番中間人費用，預計產品可以平市價約三成，又會開網站攻內地客，話內地人都慣晒用微信支付嚟網購。
佢講講吓提到大數據，話咪以為齋開店咁簡單，到時會實現「共享客戶」。一句到尾，即係介紹現有證券客戶買珠寶，同時又介紹買珠寶嘅客戶去證券行開戶。佢講笑話，大家結婚記住搵佢，佢頂多原價出售，一蚊都唔賺，真係多謝晒。
同場仲有主席「細仔」郭曉澤（Danny），佢自我介紹話舊年加入富昌，家陣係主席助理，同其他員工一樣朝九晚七。
本身喺英國讀犯罪學嘅Danny話本來想做社工，應爸爸邀請加入公司試一試，目前乜都做，文書工作居多。所謂虎父無犬子，唔知Danny又有冇投資呢？佢就怕醜笑一笑，話都係投資公用股收息為主，好保守喎。
李華華
mailto:
[email protected]