一年前，法庭裁定前「頭號梁粉」劉夢熊妨礙司法公正罪成，即時入獄，尖啤聞判後向CY隔空傳話「善有善報，惡有惡報，若然未報，時辰未到，時辰一到，一切都報！」一年後嘅今日，夢熊大師出冊喇！
呢一年尖啤雖然身陷囹圄，但港澳辦主任王光亞都一度盛讚為「大筆桿子」嘅佢，當然繼續緊貼時局，仲經常執筆寫信同外界交流時事政見，早排回信《蘋果》同事，話喺呢段失去自由嘅日子，並冇屈服做「鵪鶉」，依然一身正氣，繼續是其是、非其非，喺報章發表長篇時事評論，反左、批梁、反港獨，形容自己唔會被打敗，仲話「花落自有花開日，蓄芳待來年！」

今晚披露牢中生活

重獲自由嘅夢熊大師，今朝出冊之後會先返屋企稍事休息，夜晚強勢回歸才子陶傑主持嘅節目《光明頂》開咪，能夠暢所欲言，對尖啤嚟講先係最珍貴。才子話今晚重點會講特首選情，亦會披露夢熊大師獄中生活。早排尖啤都同八方同事講過，喺獄中抱住「俯仰無愧」心情睇書學習，仲勤做運動鍛煉身體，成功減磅34磅，非常健康咁話，唔知個招牌肚腩仲有冇得留低呢？
香港政局依舊波譎雲詭，梁振英喺12月宣佈唔尋求連任特首，算係應驗咗夢熊大師嘅「惡報」之說，但政壇盛傳CY嚟緊獲晉升全國政協副主席，尖啤復出會唔會出手攔截，再度引爆政治炸彈？新一屆特首選舉提名期又未完結，大師又會如何點評幾位等緊入閘嘅馬仔，又有冇內幕堅料左右選情？相信大家都熱切期待。各位觀眾，買定花生未？

李八方

【劉夢熊入冊事件簿】 http://bit.ly/DreamBear