有「翻版栢芝」之稱嘅陶枳樽（Crz），今日喺書展為其人生首本寫真宣傳，佢話呢本寫真除咗有實體書外，仲會出電子書，今日Crz以性感低胸吊帶打扮，到寫真攤位宣傳，佢直言感到壓力：「好在師姐陳蕊蕊畀咗好多意見我，亦幫咗我好多，嚟到書展會簽名影相。」

問到着得咁性感，擔唔擔心遭鹹豬手？佢話：「嚟之前着咗褸，嚟到就除褸。（怕鹹豬手？）唔怕，大會安排四個保安，啱啱出lift行入嚟，都有人想搵我簽名，畀保安一掌推開。」問到點樣吸引多啲讀者買寫真？佢笑言：「現場拉低條拉鏈。」

會否留喺書展現場，睇競爭對手銷情？佢話：「自己都會巡一巡，噚日有報道話我同雞排妹（鄭家純）冇交流，等陣都會同佢見下面，同佢交流下，嚟緊之後幾日去內地拍劇，未有時間喺香港宣傳，銷情係點暫時未知，公司同事會幫手。」