蔡卓妍（阿Sa）、卓韻芝、凌文龍同張銘耀等，噚日喺灣仔出席舞台劇《情敵勸退師》記者會，呢套劇8月會喺演藝學院公演。阿Sa話佢同阿芝一樣係舞台劇新人，但冇緊張同擔心，因為呢套係喜劇，佢好耐冇拍喜劇，所以接到邀請即刻話做，阿芝就話劇中同阿Sa鍾意咗同一個男士。

阿芝喺劇中同已婚嘅阿Sa係情敵，佢以低胸裝力撼「正印」阿Sa，阿Sa話：「今日冇特別去做角色造型，今日仲係阿Sa同阿芝，我係飾演一個有錢女，亦係一個蛋糕師傅。」阿芝就話：「我演一個舞台劇演員同編劇，創意好澎湃，其實到𠵱家都未知邊個係小三，觀眾要到最後一秒先會知道。」

監獄模式睇實老公

問到佢哋同時愛上嘅男士會唔會喺劇中出現？阿Sa即刻話：「我好希望有，我哋傾劇本嘅時候，我同阿芝一齊幻想係古天樂，覺得啱數啲吖嘛！但其實呢個男人係唔會喺劇中出現。」

阿Sa又講到呢個劇嘅題材容易搵到共鳴，因為社會上確實好多呢類事情發生。阿芝指情敵係一個好大恐懼，一段關係耐咗最怕有第三者，「如果有第三者，我會收起老公嘅護照、八達通、信用卡，睇你去得邊，我會用監獄模式對付佢。」同石恆聰拍緊拖嘅阿Sa就有另一睇法：「講就容易，梗係話飛咗佢啦，黐線！但係你同唔同嘅人，關係會唔一樣，大家經歷咗乜嘢，其他人係唔會知，所以好難去秤究竟嗰陣時會點。」
撰文：馮仁昭