建制派今日喺立法會硬推被民主派批評為「割地自閹，立會廢權」嘅一地兩檢條例草案之際，平日作風低調，卻試過因為喺立法會開會期間喪睇另一議員、白鴿黨黃碧雲資料，又用過google map「揸車」去天水圍而「成名」嘅勞工界議員「潘少」潘兆平，又有新搞作，就係投票期間狂睇明代太監鄭和下西洋嘅資料，唔知同審議緊嘅呢條「自閹」條例有乜關係？

話說今日立法會就民主派議員提出嘅修正案表決期間，有傳媒見到對住個電腦Mon睇得得相當專注嘅潘少，唔係睇緊一地兩檢資料或相關新聞，而係睇緊內地網站「知乎」一篇題為「明朝在鄭和之後為什麼不再有官方或者大規模的遠航甚至禁海？」嘅文章，其後亦睇咗唔少鄭和下西洋圖片資料，似乎對「魂遊大海」好有興趣喎！