富士康（2038）母公司鴻海集團的大老闆兼董事長郭台銘，近日一番「百萬員工是動物」的言論，未見中、港媒體報道，甚為可惜。要了解郭董的精神面貌和管理哲學，我哋覺得不能遺漏他這段最新發言。
鴻海日前在台北市立動物園舉辦尾禡，郭台銘當時表示，人都係動物，鴻海每日管理一百多萬頭動物，令他頭痛得要死。他自覺好風趣咁話，將招攬動物園園長加入鴻海，有利於有效管理員工。

根據台灣報章引述，郭台銘講完「鴻海全球有百萬大軍，人也是動物，要管理一百萬動物，頭痛得要死。」仲有進一步演繹，唔係戲言幾句咁簡單。郭台銘認為動物園非常多樣，園長卻可以有效管理動物園，係因為熟知各種動物特性，不會將老虎和雞放一起。
郭董越講越覺得有意思，話有意向園長取經，學習管理人與人之間的相處哲學。他當場指示坐在台下的鴻海集團各業務分支主管，在鴻海年終檢討會上，請動物園園長進行教學。

鴻海近年有兩件事出晒名，其一係成為蘋果iPad同埋iPhone兩樣大熱產品的主要代工廠，收入大增，造就郭台銘成為台灣首富。另外一樣係內地員工接連跳樓自殺，被揭施行軍事式管理。
郭台銘如今口沒遮攔，似係有恃無恐，鴻海跟蘋果關係十分牢固。但經過眾多工人團體和NGO不斷施壓，要求蘋果定單不要流向血汗工廠，霸道如蘋果，都唔係對壓力完全當冇件事。蘋果上周首度公佈供應商名單（正式確認了香港上市的富士康完全冇份），承認部份供應商存在聘用童工、員工超時工作、未發放合理工資及違規排污等問題，已邀請外部機構監督供應商。
其實蘋果已開始減少對鴻海的依賴，大量iPhone4S訂單俾咗由華碩分家出來的另一台資代工廠和碩，台灣媒體視和碩將會成為鴻海的心腹大患。蘋果睇中和碩，未必因為鴻海管理員工的手法，不過郭董意氣風發的「動物園論」，一旦傳到蘋果TimCook耳邊，恐怕只會加強蘋果作多手準備的決心。

D&G上星期日再被圍攻，又做唔成生意。不過，即使無畀人圍攻的其他名牌，都唔見得好好景。好似Tiffany去年中食盡大中華市場增長，就連歐、美、日等市場銷售都全線報捷，市場對奢侈品看法一片樂觀。短短半年之後，Tiffany最新公佈聖誕假期（11至12月）銷售數據淋了一盤冷水。受盡投資界追捧的名牌股，係時候要夢醒。
依據最新銷售數據，Tiffany第一大的美國市場的同店銷售按年增長幅度由第3季（8月至10月）的19%跌至2%，第二大的亞洲市場（不計日本）最新的同店銷售增長只得13%，遠低於第3季的36%。Tiffany官方解釋竟然係歐美銷售累事，有意無意將責任歸究於當地經濟。
《金融時報》專欄對解釋唔收貨，話歐美放緩早已是意料中事，反而包括大中華市場的亞洲區銷售何以急速放緩，公司卻提都唔提，當無事發生。

我哋都認為Tiffany想轉移視線，不過即使深究一下美國市場銷售數據，亦會發現唔多對路。Tiffany第二季（5至7月）同店銷售按年增長24%，第三季增19%，但到聖誕假期增長僅得2%，起得快，跌得快，搞邊科？查實Tiffany去年曾經解釋，美國超過一半增長都來自旅客消費，當中以內地客為首，專門掃2萬至5萬美元的貴價貨。所以話，Tiffany於美國增長都係靠中國主導。
今次美國銷售增長大跌，正好顯示內地豪客購買力見頂。管理層冇可能不知，佢哋唔願意講真說話，又唔提亞洲區銷售數據，好可能係連自己都一廂情願，希望中國市場的美好夢境，唔係一瞬即逝。
但消費力降溫的現象比比皆是。好似本報昨日報道，一度被內地資金熱炒至16萬元一箱的08年Lafite，也跌至不足10萬元。反映貴價紅酒Liv-ex100FineWineindex去年已由高位下跌兩成。另一家珠寶鐘錶名牌卡地亞行政總裁BernardFornas接受《彭博社》訪問時亦指出，受到經濟因素影響，消費者都避免太過奢華，晒命意欲減低，寧願買平實款式。

隨着中國等新興經濟體增長放慢，金飾、珠寶等奢侈品銷售放緩隨時陸續有來，香港零售市道將無可避免受到影響。各大名店用天價租金搶貴中環、銅鑼灣、廣東道等旺舖，搞到開支大增。此消彼長之下，輕微放緩都會狠狠蠶食公司Margin，一巴打醒這場名牌夢。