當年今日
關於我們

魚缸暴炒族:撈底最緊要識食糊 - 方星俠

蘋果日報 2008/09/30 00:00


美國「國難」當前,眾議院竟可否決7000億美元救市方案!前晚星俠夜不能寐,一路全程睇實美股走勢就一路心驚驚,原來這就是民主國家可愛之處!咁搞法,真係估佢唔到。
按理前日應冇乜淡友敢沽過夜,因為大家都諗住救市方案應「暢通無阻」。美股前晚大跌777點,港股昨日大幅低開逾千點,事前唔敢沽過夜的淡友自然食唔到呢一浸,但金融海嘯已席捲歐洲,投資氣氛轉壞兼變數增加,淡友可能見勢伺機追沽。但昨日港股又玩「大奇迹日」戲碼,開市後即追沽的淡友可謂有苦自知。
會否再現大奇迹日?
計埋舊年「817」,港股已三度出現「大奇迹日」玩法,好多散戶開始習慣成自然,認為股市大跌過千點隨時拗腰上返去,但類似的奇迹下次會否再出現?大家不妨思考一下。
中國海外(688)昨低見7.77元,惟未跌穿近期低位6.98元,即隨大市步伐收復失地之餘,更倒升5%至9.20元收市。以中海質素,誠是內房股板塊炒作首選,但家陣內地樓市立立亂,冇人估到幾時復蘇,股價表現咁勇應屬跌得殘而反彈,股友若有幸低撈成功,應伺機食糊,不宜大貪。
方星俠
empty