足總今日召開港超聯會議，商討復賽及新一季球賽事宜。國際足協（FIFA）最近發出復賽指引，新簽入球員不能上陣，與足總早前的指引有出入，傑志會長伍健會後指足總文件繙譯有誤，而足總主席貝鈞奇則表示會向FIFA申請「特事特辦」。

FIFA早前發出指引，各地聯賽復賽後，為了維持完整性，球會不能派遣新簽入的球員在聯賽復賽中上陣。足總今日與港超聯球會開會，會後傑志會長伍健表示：「當日收到份足總畀嘅國際足協規則，我哋冇懷疑到足總繙譯英文嘅能力，照單全收，但今日再睇返，同國際足協嘅英文例完全錯嘅。」伍健認為，FIFA作出條例詮釋，難以推翻，「對球會、球員嚟講都大失預算」。伍健指，傑志已簽入六位新球員，若最終在復賽未能派遣新球員上陣，傑志仍有足夠青訓球員應付比賽，他說：「國際足協文件建議，用青年軍球員解決球員不足問題，傑志一定夠，但件事唔應該咁處理。四月時有文件建議，完約球員應該自動延長合約到球季完結，如跟足就冇問題，但足總跟啲唔跟啲，佢唔跟，就球會要食一棍。」伍健指，一直有留意FIFA規例，組軍時有預計現時情況會發生。

足總主席貝鈞奇就指，會向FIFA申請，冀可「特事特辦」，他說：「比較尷尬地方，係好多球員5月31完約，疫情唔知幾時完，當時作咗決定，同超聯會講過，有呢個安排。問題出現，大家希望盡快解決，足總會去信國際足協，徵詢佢哋意見，或者可以『特事特辦』，畢竟全世界都因為疫症，碰到好多未試過嘅事。」他又指，若未能成功爭取，外援「大換血」的冠忠南區等球會或不夠球員出賽。

另外，貝鈞奇指僅餘六隊出戰的港超聯暫定8月22日展開，9月尾完成，盼新一季可以盡快展開。新季晉峰很大機會升班，貝說：「合理嘅，佢排第一，兩隊超聯隊退出，甲組有一隊，甚至兩隊升班合理。」和富大埔若找到贊助商，亦不排除續戰港超聯，貝續說：「假設大埔搵到贊助，到時要再傾，又或者到時已經夠10隊。」他表示，除晉峰外沒有其他甲組會表達過升班意向，而來季暫定保留菁英盃，聯賽保持雙循環，外援數量不變，貝指：「如果搵到個歐洲國家隊踢過，有吸引力嘅（外援），都可以『特事特辦』研究吓，不妨喺董事局檢討吓。」

記者、攝影：禤家民

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
--------------------------------
《體蘋果》陪你睇波講波

https://www.fb.com/appledailysports