由韓劇《善德女王》女星高賢貞、金惠子、高斗心等一班好戲之人孭飛嘅tvN新劇《DearMyFriends》噚晚首播,之前預告過有重量級串星登場,結果不負所望,趙寅成同李光洙都係第一集出晒場,刺激收視高開4.9%,比起上一檔劇集《記憶》(3.6%)大結局仲高,而同日首播嘅尹施允主演嘅JTBC劇《魔女寶鑑》收視只有2.6%,完全被大幅拋離。
客串嘅趙寅成喺第一集《DearMyFriends》中同高賢貞玩視像聊天,趙寅成唔肯將鏡頭對住自己,搞到高賢貞好心急,以熄鏡頭威脅趙寅成,之後高賢貞突然手機響起,佢掛住傾電話,搞到趙寅成呷醋,叫高賢貞即刻熄機等自己消失,「我唔想聽到你同其他男人通話,立即關掉!」
至於光洙就客串飾演金惠子嘅兒子,有一幕講佢同家人傾爸爸死後,由誰來照顧媽媽嘅場面時,佢演出火爆,反枱並捉住哥哥嘅衫領說:「阿嫂之前講過媽媽要比爸爸早死先得,媽媽由我來養!」
唔少觀眾睇完之後都大讚趙寅成同光洙演出精采,指趙寅成嘅登場簡直係淨化眼球,好想二人唔係客串就好喎。