北京大執位，江爺出局，胡溫得勢。下屆特首將會點樣擺局，呢個話題日漸蓋過長毛大班等立法會嘅動物園化現象，今年下半年，香港政治氣候肯定會雷暴交加，間中有陽光。
據北方嘅知情人士講，胡溫上位，香港全線告急嘅，唔係民主黨，而係「商人治港」成個概念。當初江總高調握手欽點董商人，點知呢七年來，「商人治港」變為「商人禍港」，經已證明係一張充滿赤字嘅成績單。
胡錦濤喺四中全會高調點明要保障香港繁榮安定，即是話香港問題，從此正式歸納入胡溫新政嘅權力範圍，咁下屆特首人選，當然唔到阿曾（唔係煲呔呢個「細曾」，亦唔係金利來嗰個「烏曾」，亦唔係保皇民建聯23條沙沙滾嘅「沙曾」，佢亦坐鎮華夏權力中心，所以叫「唐曾」）話晒事，而係我哋胡主席漸漸有強大發言權咯喎。
胡溫新政，關懷弱勢社群，喺大陸，佢哋嘅強項就係替民工向老細追討工資，嫉無良奸商資本家如仇，加埋又尊崇毛澤東，鍾意去吓西柏坡呢亭地方踎喺處同啲老農食吓餃子，下屆特首重畀「商人治港」，有冇搞錯？睇怕下次好快六十名議員上京，胡錦濤會單獨會見吓我哋長毛，吸取吓呢位香港無產階級革命家嘅意見，話唔定大家傾得埋，長毛可以做特首㖭。