華華平時出席唔少記者會同宣傳活動，如果嗰日多大新聞，仲要一日走幾場採訪，所以主辦單位多數都好準時，不過噚日數碼通（315）搞咗個手機網絡測速會，居然要華華同一班記者行家等成45分鐘，認真過份！

話說數碼通噚日邀請咗一班記者出席活動，但華華事前完全唔知個活動主題係乜，只知道朝早10點45分喺太古城地鐵站集合，華華當時心諗，數新地（016）之前出咗事，同系嘅數碼通係咪有特別嘢交代呢？結果等啊等，等足九個字先知原來活動係做手機網絡速度測試，而且原定太古城嘅測速地點搞唔成，要去九龍灣megaBOX至試到。

有幾位記者行家已經嬲到走咗，但華華抱住觀摩嘅心態，想睇吓「聰明台」3G速度究竟有幾快，就跟足全程，結果大約12點到咗九龍灣，測試咗成個鐘至完成，跟住又趕過去將軍澳新都城試吓聰明台新裝嘅4G發射站；搞咗兩個幾鐘，終於有樣嘢值得華華同各位讀者分享，就喺佢哋攞咗兩部同款手機，分別插入CSL嘅4GSimcard同數碼通內部研發嘅4GSimcard，喺商場門口兩部機都收爆五格，但入咗門口幾步，兩部機接收已經得番三格，再行入商場中間，已經完全收唔到。數碼通科技總裁鄒金根就話，公司一直唔推4G業務，因為4G網絡覆蓋未成熟，而今次事實證明咗的確4G接收有問題，搞咗三個幾鐘，華華總算有嘢同讀者交代：香港4G未掂囉。

李華華
mailto:[email protected]