【李八方online】蘇B一支公重返維園開《城壇》: 論政都應該普及
李八方ONLINE武漢肺炎城市論壇蘇敬恆
《城壇》已設立電話專線9032 4566,港台工作人員會安排致電的市民進行視象發言。網上片段截圖
政府抗疫不力,武漢肺炎至今仍未斷尾,令港台皇牌節目《城市論壇》自去年11月24日後至今連續41個星期,超過10個月未重返維園開壇。《城壇》主持「蘇B」蘇敬恆今日中午12點就「一支公」重返老地方,暑假後開壇,今日主題係「論壇主持回維園 普及發聲匯百川」。佢話今日原本應該好多人投緊票,但政府因疫情宣佈押後一年,慨嘆《城壇》7月做暑假前最後一集節目,正正討論緊立法會選舉,估唔到世事變化咁快。
蘇B透露今日重返維園做網上直播,係想為大家「熱下身」,話因應疫情同限聚令,佢估計《城壇》未來一段時間都唔可以喺維園做節目,但因為佢真係好鍾意維園,尤其懷念維園平時用嚟做節目、目前已被封嘅維園音樂亭,所以趁新一季節目開始前返維園畀大家感受下自由空氣。
蘇B展示一條1.5米長嘅道具,話大家要保持社交距離,「但發言無界限,視像齊表達」。網上片段截圖
由於預計《城壇》未來一段時間難以設立現場觀眾,《城壇》已特別設立電話專線畀巿民發言,呼籲大家下星期致電90324566呢個號碼,港台嘅工作人員就會安排進行視像發言。蘇B其間又展示一條1.5米長嘅道具,話大家要保持社交距離,「但發言無界限,視像齊表達」。
今年係《城壇》40周年,蘇B強調呢40年來都希望可以喺開放環境空間下,畀大家毫無恐懼下表達諗法,《城壇》近月一直同康文署同維園聯絡,希望早日返維園音樂亭做節目,話除咗普及檢測,「論政都應該普及」,呼籲市民下周日中午12點喺港台電視31睇新一季《城壇》直播。
-----------------------------
-----------------------------
《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於
《蘋果日報》你的優惠 網上獨家發售!