唔少內衣股、服裝股上市，喺記者招待會都會請model(模特兒)着上公司嘅產品，等大家親眼睇下公司產品外，又為現場增添樂趣。本港首隻「婚紗股」、婚紗及伴娘裙製造商嘉藝控股(1025) 亦唔例外，噚日記者會上，就搵嚟兩位model着上自家製嘅婚紗及伴娘裙繞場一周，不過公司生產嘅裙款有過百款，兩位model又點夠呢，於是由主持人到接待處，成班靚女公關化身model，齊齊換上伴娘裙，最後仲同主席莊碩影大合照。

雖然啲伴娘裙唔係超級性感，但都係露背、吊帶款，噚日天氣都有啲凍，但班靚女公關都頂硬上，出嚟嘅氣勢拍得住真正model。如此認真，公關真係敬業樂業！

適逢噚日情人節，接待處仲有兩位「伴娘」向在場人士每人送上一枝朱古力玫瑰花，華華有一刻以為自己去咗參加婚禮丫。

猶記得，幾年前有間胸圍股上市開記招，又係同一間公關公司負責，果次就冇搵自己公關親身上陣，但搵嚟兩位高佻model着上內衣影下相，令現場熱血沸騰，真係不得不服公關有諗頭。

10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI