曾演出韓片《延坪海戰》同《3個特攻美少年》嘅男星李玹雨,日前來港出席除夕倒數活動,之後佢留喺香港幾日,到今午先離港返韓國。
今午約兩時十分,李玹雨戴住黑色口罩﹑黃色帽及身穿黑色外套,手拎背囊,由四名保安築人牆,行去登機入口,現場仲有韓國助手及工作人員,並有數十粉絲送機。
李玹雨沿途耷低頭,冇乜同粉絲互動,但粉絲不停叫OPPA,但佢都冇反應,而粉絲又送禮物及零食。當李玹雨行到專用閘口時,粉絲仍大叫OPPA,佢先識做揮手示意再見。
正當佢轉身入閘口時,因為要Check護照,機場職員要求佢除低口罩,入閘口佢再一次轉身同粉絲揮手;而過關時佢要除帽,而閘外粉絲仍唔捨得走,繼續叫OPPA,李玹雨第三次轉身,同fans揮手講再見。